लोणावळा : गवळीवाडा परिसरात महिलेच्या गालावर स्टीलच्या छोट्या चाकूने वार करून जखमी केल्याची घटना मंगळवारी (६ ऑक्टोबर) सकाळी साडेअकराच्या सुमारास घडली. याप्रकरणी लोणावळा शहर पोलिसांनी महिलेच्या पतीविरोधात भारतीय न्याय संहितेच्या कलम १०९ (१) अन्वये गुन्हा दाखल केला आहे.
पोलिसांनी दिलेल्या माहितीनुसार, वनिता सतीश भागानगरे (वय ४२, रा. गवळीवाडा, लोणावळा) यांनी याबाबत फिर्याद दिली आहे. ६ ऑक्टोबर रोजी सकाळी साडेअकराच्या सुमारास बाळू शिर्के यांच्या घराजवळील इमारतीजवळ हा प्रकार घडला. त्यावेळी आरोपी सतीश अशोक भागानगरे याने स्टीलच्या छोट्या चाकूने वनिता भागानगरे यांच्या गालाच्या डाव्या बाजूस वार केल्याचे फिर्यादीत नमूद करण्यात आले आहे.
या घटनेत वनिता भागानगरे जखमी झाल्यानंतर त्यांनी लोणावळा शहर पोलीस ठाण्यात तक्रार दिली. त्यानुसार पोलिसांनी सतीश भागानगरे यांच्याविरुद्ध गुन्हा दाखल केला आहे.
गुन्ह्याची नोंद ६ ऑक्टोबर रोजी दुपारी ३ वाजून ३७ मिनिटांनी करण्यात आली. गुन्ह्याचा वर्दी अहवाल प्रथम वर्ग न्यायदंडाधिकारी, वडगाव यांच्या न्यायालयात रवाना करण्यात आला असून, वरिष्ठांच्या आदेशानुसार पुढील तपास पोलीस उपनिरीक्षक कुलकर्णी करीत आहेत.
