शांती चौकातील घटनेने खळबळ; राहुल वाघमारे याच्याविरुद्ध लोणावळा शहर पोलिसांत गुन्हा दाखल.
लोणावळा : शहरातील शांती चौक परिसरात एका तरुणावर धारदार हत्याराने हल्ला करून त्याला गंभीर जखमी केल्याची घटना शनिवारी (दि. २६ सप्टेंबर) दुपारी घडली. या हल्ल्यात प्रमोद प्रकाश फाटे (वय ३४, रा. औंढे रोड, कुसगाव, ता. मावळ) हे गंभीर जखमी झाले आहेत. याप्रकरणी राहुल यशवंत वाघमारे याच्याविरुद्ध लोणावळा शहर पोलीस ठाण्यात जीवे ठार मारण्याचा प्रयत्न केल्याप्रकरणी गुन्हा दाखल करण्यात आला आहे.
पोलिसांनी दिलेल्या माहितीनुसार, प्रमोद फाटे हे शनिवारी दुपारी सुमारे २.३० वाजण्याच्या सुमारास लोणावळ्यातील शांती चौक येथील चरण यांच्या चिक्कीच्या दुकानासमोर उभे होते. यावेळी राहुल यशवंत वाघमारे याने कोणतेही कारण नसताना त्यांच्यावर हल्ला केल्याचा आरोप फिर्यादीत करण्यात आला आहे.
आरोपीने धारदार हत्याराने प्रमोद फाटे यांच्या डोक्यावर, खांद्यावर तसेच डाव्या हातावर वार केल्याचे फिर्यादीत नमूद करण्यात आले आहे. अचानक झालेल्या या हल्ल्यामुळे परिसरात काही काळ गोंधळाचे वातावरण निर्माण झाले. हल्ल्यात फाटे यांच्या शरीरावर गंभीर दुखापत झाली.
हल्ल्यानंतर आरोपीने जीवे मारण्याची धमकी दिल्याचेही फिर्यादीत नमूद करण्यात आले आहे. या प्रकरणात जीवे ठार मारण्याच्या उद्देशाने हल्ला केल्याचा आरोप करण्यात आल्याने लोणावळा शहर पोलिसांनी राहुल वाघमारे याच्याविरुद्ध संबंधित कलमांनुसार गुन्हा दाखल केला आहे.
दरम्यान, हा हल्ला नेमका कोणत्या कारणातून झाला, याबाबतची माहिती तपासातून समोर येणार आहे. पोलिसांकडून घटनेचा पुढील तपास सुरू असून हल्ल्यात वापरण्यात आलेल्या हत्यारासह घटनेशी संबंधित इतर बाबींचाही तपास केला जात आहे.
या प्रकरणाचा पुढील तपास पोलीस उपनिरीक्षक चंदनशिवे करीत आहेत.
