तळेगाव दाभाडे जनरल हॉस्पिटलमध्ये १८ ऑगस्ट रोजी घटना; कुसगाव बुद्रुक, लोणावळा येथील कुटुंबीयांकडून चौकशीची मागणी..
लोणावळा : कुसगाव बुद्रुक येथील रूपाली इंदलकर यांच्या प्रसूतीनंतर आई आणि नवजात बाळाचा मृत्यू झाल्याची धक्कादायक घटना १८ ऑगस्ट रोजी घडली. या घटनेनंतर इंदलकर कुटुंबीयांनी तळेगाव दाभाडे जनरल हॉस्पिटलमधील उपचार पद्धती आणि उपलब्ध वैद्यकीय सुविधांबाबत गंभीर प्रश्न उपस्थित केले आहेत.
रूपाली इंदलकर यांना १८ ऑगस्ट रोजी दुपारी चार वाजता तळेगाव दाभाडे जनरल हॉस्पिटलमध्ये दाखल करण्यात आले होते. त्यापूर्वी १७ ऑगस्ट रोजी डॉक्टरांनी त्यांना रुग्णालयात दाखल होण्यास सांगितले होते. प्रसूतीसाठी सिझेरियन शस्त्रक्रिया करावी लागणार असल्याचे डॉक्टरांनी त्यांना आधीच सांगितले होते, अशी माहिती त्यांचे पती सोमनाथ इंदलकर यांनी दिली.
सोमनाथ इंदलकर यांच्या सांगण्यानुसार, रुग्णालयात सिझेरियन शस्त्रक्रिया करण्यात आली. शस्त्रक्रिया सुरू असताना कुटुंबीय सुमारे अडीच तास ऑपरेशन थिएटरबाहेर थांबून होते. त्यानंतर रूपाली यांना मागच्या दाराने आयसीयूमध्ये दाखल करून व्हेंटिलेटरवर ठेवण्यात आले, असे त्यांनी सांगितले.
यानंतर डॉक्टरांनी “१५ ते २० मिनिटांत तुम्ही रुग्णाला भेटू शकता” असे कुटुंबीयांना सांगितले, मात्र काही वेळातच रूपाली यांचा मृत्यू झाल्याची माहिती कुटुंबीयांना मिळाली, असा दावा सोमनाथ इंदलकर यांनी केला.
दरम्यान, प्रसूतीनंतर नवजात बाळाला पुढील उपचारासाठी जनरल हॉस्पिटलमधील कर्मचारी स्वतः घेऊन YCM रुग्णालयात गेले. त्यांच्यासोबत रूपाली इंदलकर यांचा भाऊही होता. YCM रुग्णालयात पोहोचल्यानंतर तेथील डॉक्टरांनी “आम्हाला याबाबत आधी काहीही कळवण्यात आले नव्हते आणि या उपचारासाठी आवश्यक सुविधा आमच्याकडे उपलब्ध नाही” असे सांगितले, असा दावा कुटुंबीयांनी केला. त्यानंतर बाळाला पुढील उपचारासाठी पुण्यातील ससून रुग्णालयात नेण्यात आले.
ससून रुग्णालयात बाळाच्या हृदयाचे ठोके तपासल्यानंतर बाळाचा मृत्यू आधीच झाला असल्याचे डॉक्टरांनी सांगितले, असा दावा कुटुंबीयांनी केला आहे.
या घटनेनंतर रूपाली इंदलकर यांच्या आईने रुग्णालयातील ऑक्सिजन सुविधेबाबत गंभीर प्रश्न उपस्थित केला. “रुग्णालयात ऑक्सिजनची सुविधा नव्हती, तर माझ्या मुलीला तिथे दाखल का केले? आधीच सांगितले असते की ऑक्सिजनची सुविधा नाही, तर आम्ही तिला दुसऱ्या रुग्णालयात घेऊन गेलो असतो,” असा सवाल त्यांनी केला.
कुटुंबीयांच्या म्हणण्यानुसार, प्रसूतीनंतर रूपाली यांची प्रकृती गंभीर झाली आणि त्यांना आयसीयूमध्ये व्हेंटिलेटरवर ठेवण्यात आले, तर नवजात बाळाला पुढील उपचारासाठी प्रथम YCM आणि त्यानंतर ससून रुग्णालयात हलवण्यात आले.
मात्र, रुग्णालयात ऑक्सिजनची सुविधा उपलब्ध नव्हती किंवा उपचारात वैद्यकीय निष्काळजीपणा झाला, हे अद्याप अधिकृतरीत्या सिद्ध झालेले नाही. कुटुंबीयांनी केलेल्या आरोपांबाबत तळेगाव दाभाडे जनरल हॉस्पिटल प्रशासनाची अधिकृत भूमिका समोर येणे आवश्यक आहे. उपचारांची कागदपत्रे आणि संबंधित वैद्यकीय अहवालांतूनच मृत्यूचे नेमके कारण स्पष्ट होऊ शकेल.
रूपाली इंदलकर आणि त्यांच्या नवजात बाळाच्या मृत्यूमुळे कुसगाव बुद्रुक परिसरात हळहळ व्यक्त होत असून, या प्रकरणाची सखोल चौकशी करून सत्य परिस्थिती समोर आणावी, अशी मागणी कुटुंबीयांकडून केली जात आहे.
अष्टदिशा प्रतिनिधी | लोणावळा
