लोणावळा : लोणावळ्यातील भांगरवाडी परिसरातील वाहतूक कोंडीचा प्रश्न दिवसेंदिवस गंभीर होत असून, रेल्वे गेट उघडल्यानंतर कृष्णा फास्ट परिसरापासून राम मंदिरापर्यंत वाहनांच्या लांबच लांब रांगा लागल्याचे चित्र वारंवार पाहायला मिळत आहे. अरुंद रस्ता, रस्त्याच्या कडेला उभी केली जाणारी वाहने, दुकानांसमोर माल उतरविण्यासाठी रस्त्यावर थांबणारी मालवाहू वाहने आणि वाढलेली वाहनांची वर्दळ यामुळे या मार्गावरून ये-जा करणाऱ्या नागरिकांना मोठ्या त्रासाला सामोरे जावे लागत आहे.
भांगरवाडीचा रस्ता हा केवळ स्थानिक नागरिकांसाठीचा मार्ग नसून कुसगाव, डोंगरगाव तसेच मुंबई-पुणे द्रुतगती मार्गाच्या दिशेने जाणाऱ्या वाहनांसाठीही महत्त्वाचा मार्ग आहे. त्यामुळे या रस्त्यावर दिवसभर मोठ्या प्रमाणात वाहतूक असते. रेल्वे गेट बंद असताना वाहनांची मोठी गर्दी होते आणि गेट उघडल्यानंतर ही वाहने एकाच वेळी भांगरवाडीच्या दिशेने पुढे येतात. अशावेळी रस्त्याच्या कडेला एखादे वाहन उभे असेल किंवा मालवाहू वाहन रस्त्यात थांबून मालाची चढ-उतार सुरू असेल, तर वाहतुकीचा वेग पूर्णपणे मंदावतो आणि काही वेळातच वाहनांच्या लांबच लांब रांगा लागतात.
भांगरवाडीचा रस्ता अरुंद असल्याची माहिती वाहनचालक, दुकानदार आणि स्थानिक नागरिकांना आहे. तरीही खरेदीसाठी आलेले काही नागरिक रस्त्याच्या कडेला वाहने उभी करून दुकानात जातात. काही ठिकाणी मालवाहू वाहने रस्त्यावरच उभी करून माल खाली केला जातो. संबंधित वाहन काही वेळासाठी उभे असले तरी त्या काही मिनिटांचा परिणाम मागे लागलेल्या अनेक वाहनांवर होतो. एका वाहनामुळे सुरू झालेली कोंडी पुढे मोठ्या रांगेत रूपांतरित होते आणि त्याचा त्रास मात्र कोणतीही चूक नसलेल्या नागरिकांना सहन करावा लागतो.
विशेष म्हणजे लोणावळा शहरातील वाहतूक नियंत्रणासाठी T.W. Town या खासगी संस्थेच्या कर्मचाऱ्यांची नगरपालिका खर्च करून वाहतूक व्यवस्थेसाठी नियुक्ती करते. मात्र हे कर्मचारी नेमक्या कोणत्या ठिकाणी आणि कोणत्या वेळेत वाहतूक नियंत्रण करतात, याबाबत नागरिकांमध्ये प्रश्न उपस्थित होत आहेत. कुमार हॉटेल परिसर आणि बसस्थानक येथे वाहतूक नियंत्रण करताना कर्मचारी दिसतात; मात्र भांगरवाडी, लोणावळा बाजार आणि रेल्वे गेट परिसरात वाहतूक कोंडी निर्माण झाल्यानंतर त्याचे प्रभावी नियंत्रण कोण करणार, असा सवाल नागरिकांकडून उपस्थित केला जात आहे.
कुमार हॉटेल परिसरातही अनेकदा मोठी वाहतूक कोंडी होते. बसस्थानक परिसरात बस वळवताना आणि प्रवाशांची ये-जा सुरू असताना वाहनांची मोठी गर्दी निर्माण होते. त्यामुळे या ठिकाणीही वाहतूक नियंत्रणाची आवश्यकता आहे. मात्र शहरातील एका-दोन ठिकाणीच कर्मचारी उभे करून संपूर्ण लोणावळ्याची वाहतूक व्यवस्था सुरळीत होणार नाही. ज्या-ज्या ठिकाणी प्रत्यक्ष कोंडी निर्माण होते, त्या ठिकाणी त्याच वेळी वाहतूक कर्मचारी उपस्थित राहणे आवश्यक आहे.
या वाहतूक कोंडीचा फटका केवळ बाहेरून लोणावळ्यात येणाऱ्या पर्यटकांना किंवा वाहनचालकांना बसत नाही, तर लोणावळ्यात राहणाऱ्या स्थानिक नागरिकांनाही दररोज या समस्येला सामोरे जावे लागत आहे. कामानिमित्त, शाळा-महाविद्यालयासाठी, बाजारपेठेत खरेदीसाठी किंवा आपल्या दैनंदिन कामासाठी याच रस्त्याने ये-जा करणाऱ्या नागरिकांचा वेळ वाहतूक कोंडीत वाया जात आहे. एखाद्या रुग्णाला घेऊन जाणारे वाहन, ज्येष्ठ नागरिक, विद्यार्थी किंवा अत्यावश्यक कामासाठी निघालेले नागरिक वाहतूक कोंडीत अडकले तर त्याची गंभीरता आणखी वाढते.
शनिवार आणि रविवारच्या दिवशी पर्यटकांची संख्या वाढल्याने परिस्थिती आणखी बिकट होते. मुंबई, पुणे तसेच परिसरातून मोठ्या प्रमाणात वाहने लोणावळ्यात येतात. रेल्वे गेट उघडल्यानंतर एकाच वेळी मोठ्या संख्येने वाहने भांगरवाडीच्या दिशेने येतात. त्यात स्थानिक वाहतूक, बाजारपेठेतील वाहने आणि रस्त्याच्या कडेला होणारे पार्किंग यांची भर पडल्याने वाहतूक कोंडीचा प्रश्न अधिकच गंभीर होतो.
भांगरवाडीतील वाहतूक कोंडीवर केवळ अधूनमधून कर्मचारी उभे करून नियंत्रण ठेवणे हा कायमस्वरूपी उपाय ठरणार नाही. रेल्वे गेट उघडण्याच्या वेळेचा अभ्यास करून त्या काळात विशेष वाहतूक नियोजन करणे, रस्त्याच्या कडेला वाहने उभी करण्यास प्रतिबंध करणे, मालवाहू वाहनांसाठी माल चढ-उताराची योग्य व्यवस्था करणे आणि वाहतुकीला अडथळा निर्माण करणाऱ्या वाहनांवर कारवाई करणे आवश्यक आहे.
लोणावळा नगरपालिका आणि पोलीस प्रशासनाने भांगरवाडी, लोणावळा बाजार, कुमार हॉटेल, बसस्थानक तसेच रेल्वे गेट परिसरातील वाहतूक परिस्थितीचा एकत्रित अभ्यास करून प्रभावी नियोजन करणे गरजेचे आहे. नगरपालिका नागरिकांच्या पैशातून खासगी वाहतूक कर्मचाऱ्यांची नियुक्ती करत असेल, तर त्या कर्मचाऱ्यांचा उपयोग ज्या ठिकाणी प्रत्यक्ष वाहतूक कोंडी होते, त्या ठिकाणी प्रभावीपणे होणे अपेक्षित आहे.
रेल्वे गेट उघडल्यानंतर दरवेळी वाहनांच्या रांगा, बाजारपेठेत होणारी कोंडी आणि महत्त्वाच्या चौकांमध्ये होणारी वाहतूक कोंडी यामुळे नागरिकांच्या संयमाची परीक्षा सुरू आहे. ‘ही वाहतूक कोंडी कधी संपणार?’ असा सवाल आता लोणावळ्यातील नागरिकांकडून उपस्थित होत असून, नगरपालिका आणि पोलीस प्रशासनाने या प्रश्नाकडे गांभीर्याने पाहून तातडीने ठोस उपाययोजना करावी, अशी मागणी होत आहे.
