एकाच वेळी स्वतःच्या पुस्तकावर स्वाक्षरी करणाऱ्या लेखकांच्या विश्वविक्रमात सहभाग; ‘OFFICIALLY AMAZING’ प्रमाणपत्राने गौरव.
लोणावळा, दि. २९ (प्रतिनिधी) : लोणावळ्यातील हुडको कॉलनी येथे वास्तव्यास असलेल्या आणि शिक्षण क्षेत्रात कार्यरत असलेल्या असिस्टंट प्रोफेसर प्रियंका आर. तोरणे यांनी उल्लेखनीय कामगिरी केली आहे. एकाच वेळी स्वतःच्या पुस्तकावर स्वाक्षरी करणाऱ्या लेखकांच्या विश्वविक्रमात सहभागी होत त्यांनी गिनीज वर्ल्ड रेकॉर्डमध्ये आपले नाव नोंदविले आहे.
ईएसएन पब्लिकेशन्स (भारत) आणि लंडन ऑर्गनायझेशन ऑफ स्किल्स डेव्हलपमेंट (यूके) यांच्या संयुक्त विद्यमाने २६ जुलै २०२६ रोजी चेन्नई, कर्नाटक येथे हा ऐतिहासिक उपक्रम आयोजित करण्यात आला होता. या उपक्रमात देशाच्या विविध भागांतून मोठ्या संख्येने लेखक सहभागी झाले होते. सहभागी लेखकांनी एकाच वेळी स्वतःच्या पुस्तकावर स्वाक्षरी करून विश्वविक्रमाच्या नोंदीत सहभाग घेतला.
महाराष्ट्रातून या उपक्रमात प्रो. प्रियंका आर. तोरणे यांनी सहभाग नोंदविला. त्यांच्या सहभागाची गिनीज वर्ल्ड रेकॉर्ड्सकडून अधिकृत नोंद करण्यात आली असून, त्यांना ‘OFFICIALLY AMAZING’ असा उल्लेख असलेले अधिकृत प्रमाणपत्र प्रदान करण्यात आले आहे.
शिक्षण क्षेत्रात कार्यरत असतानाच लेखन क्षेत्रातील या अनोख्या विश्वविक्रमाचा भाग होण्याची संधी प्रो. प्रियंका आर. तोरणे यांना मिळाली. त्यांच्या या कामगिरीमुळे त्यांच्या शैक्षणिक आणि साहित्यिक कार्याला आंतरराष्ट्रीय स्तरावर विशेष ओळख मिळाली आहे.
लोणावळ्यातील रहिवासी असलेल्या प्रियंका तोरणे यांच्या या यशाची स्थानिक पातळीवरही दखल घेतली जात आहे. शिक्षण आणि लेखन या दोन्ही क्षेत्रांत कार्यरत राहून त्यांनी मिळविलेल्या या यशाबद्दल त्यांचे विविध स्तरांतून कौतुक होत आहे.
या उल्लेखनीय कामगिरीबद्दल श्री आनंद विद्या प्रसारक मंडळ शैक्षणिक संकुलाच्या अध्यक्ष, उपाध्यक्ष, सचिव, संचालक मंडळ तसेच प्राचार्य, मुख्याध्यापक, शिक्षक आणि शिक्षकेतर कर्मचाऱ्यांनी प्रो. प्रियंका आर. तोरणे यांचे अभिनंदन केले. त्यांच्या पुढील शैक्षणिक, साहित्यिक आणि व्यावसायिक वाटचालीस शुभेच्छा देण्यात आल्या.
प्रो. प्रियंका आर. तोरणे यांच्या या विश्वविक्रमातील सहभागामुळे लोणावळ्याच्या शैक्षणिक क्षेत्राच्या शिरपेचात आणखी एक मानाचा तुरा रोवला गेला आहे.
