लोणावळा : महाराष्ट्र लोकसेवा आयोगाच्या माध्यमातून विविध प्रशासकीय जबाबदाऱ्या सांभाळल्यानंतर पोलीस उपअधीक्षक म्हणून पोलीस सेवेत दाखल झालेले भूषण दत्तात्रय माने आता लोणावळा ग्रामीण पोलीस ठाण्याची जबाबदारी सांभाळणार आहेत. एकत्रित परिविक्षाधीन प्रशिक्षण कार्यक्रमाच्या (CPTP-10) अनुषंगाने पुढील १३ आठवड्यांसाठी त्यांची लोणावळा ग्रामीण पोलीस ठाण्याच्या प्रभारी अधिकारीपदी नियुक्ती करण्यात आली असून त्यांनी कार्यभार स्वीकारला आहे.
भूषण माने यांनी महाराष्ट्र लोकसेवा आयोगाच्या विविध स्पर्धा परीक्षांमध्ये यश मिळवत प्रशासकीय सेवेतील वेगवेगळ्या जबाबदाऱ्या सांभाळल्या आहेत. विक्रीकर विभाग, वन विभाग आणि गुप्त वार्ता विभागातील पदांवर काम केल्यानंतर त्यांनी मुख्याधिकारी म्हणूनही जबाबदारी सांभाळली. गडचिरोली येथे मुख्याधिकारी म्हणून काम करण्याचा अनुभवही त्यांच्या प्रशासकीय कारकिर्दीत आहे.
प्रशासकीय सेवेचा अनुभव घेतल्यानंतर माने यांनी पोलीस उपअधीक्षक पदाची निवड केली. पोलीस सेवेत आल्यानंतर पुणे ग्रामीण पोलीस दलात त्यांनी जबाबदारी सांभाळली असून विविध गुन्हेगारीविरोधी कारवायांमध्ये त्यांचा सहभाग राहिला आहे.
जून २०२६ मध्ये रांजणगाव एमआयडीसी परिसरातील एका लॉजिंगवर करण्यात आलेली कारवाई त्यापैकीच एक ठरली. गोपनीय माहितीच्या आधारे तयार करण्यात आलेल्या विशेष पथकाने कारवाई करत सात महिलांची सुटका केली. या कारवाईत पोलीस उपअधीक्षक भूषण माने यांच्या मार्गदर्शनाखाली पथकाने काम केले.
आता परिविक्षाधीन प्रशिक्षणाचा भाग म्हणून त्यांच्यावर लोणावळा ग्रामीण पोलीस ठाण्याची जबाबदारी सोपविण्यात आली आहे. लोणावळा परिसरात वर्षभर पर्यटकांची मोठी गर्दी असते. विशेषतः पावसाळ्यात पर्यटकांची संख्या वाढत असल्याने वाहतूक नियंत्रण, पर्यटकांची सुरक्षितता, कायदा-सुव्यवस्था आणि गुन्हेगारीवर नियंत्रण ठेवणे ही पोलिसांसमोरील प्रमुख आव्हाने आहेत.
प्रशासकीय सेवेतील अनुभव आणि त्यानंतर पोलीस उपअधीक्षक म्हणून केलेले काम या पार्श्वभूमीवर माने यांच्याकडे आता लोणावळा ग्रामीणची जबाबदारी आली आहे. पुढील १३ आठवड्यांच्या प्रशिक्षण कालावधीत ते लोणावळा ग्रामीणमधील कायदा-सुव्यवस्था आणि पोलीस कामकाज कशा पद्धतीने हाताळतात, याकडे परिसराचे लक्ष लागले आहे.
