लोणावळा : लोहगड किल्ल्यावर व्यावसायिक केतन अग्रवाल यांची दरीत ढकलून हत्या केल्याच्या प्रकरणात तपास जसजसा पुढे जात आहे, तसतशी धक्कादायक माहिती समोर येत आहे. केतन यांची हत्या करण्यापूर्वी त्यांचे हात-पाय मोडून त्यांना संपवण्याचा विचार करण्यात आला होता. त्यानंतर बाहेरील व्यक्तीमार्फत, म्हणजेच सुपारी देऊन हत्या घडवून आणता येईल का, याचीही चाचपणी झाल्याचे पोलिसांच्या तपासातून समोर आले आहे. या प्रकरणात चेतन चौधरीचा मित्र रितेश हांगे याचा सहभाग आढळून आल्यानंतर पोलिसांनी त्याला तिसरा आरोपी म्हणून अटक केली आहे.
केतन अग्रवाल हत्या प्रकरणात सिया गोयल आणि चेतन चौधरी यांना यापूर्वीच अटक झाली आहे. तपासादरम्यान चेतन आणि रितेश यांच्यातील जवळच्या संबंधांसह हत्येच्या नियोजनाबाबत झालेल्या चर्चेचे धागेदोरे पोलिसांच्या हाती लागले. रितेशला या कटाची माहिती असल्याचे तसेच त्याचा नियोजनातील सहभाग तपासात समोर आल्याचे पोलिसांचे म्हणणे आहे. त्यानंतर त्याला अटक करून न्यायालयात हजर करण्यात आले असता, न्यायालयाने १२ सप्टेंबरपर्यंत पोलीस कोठडी सुनावली.
पोलिसांच्या माहितीनुसार, केतनचा खून स्वतः न करता एखाद्या बाहेरील व्यक्तीच्या मदतीने घडवून आणण्याची शक्यता तपासण्यात आली होती. चेतन चौधरी आणि रितेश हांगे यांनी अशा पद्धतीने हत्या घडवून आणता येईल का, याबाबत चाचपणी केल्याची माहिती पुणे ग्रामीणचे पोलीस अधीक्षक संदीपसिंह गिल यांनी दिली आहे. त्यामुळे केतनच्या हत्येचा कट आखताना कोणकोणते पर्याय विचारात घेण्यात आले होते, याचाही तपास आता केला जात आहे.
दरम्यान, १८ जून रोजी केतनला लोहगडावर नेण्यात आले होते. याच दिवशी रितेशलाही लोहगडावर सोबत येण्यास सांगण्यात आले होते. मात्र, रितेशने तेथे जाण्यास नकार दिल्याचे तपासात समोर आले आहे. त्यानंतरही त्याचा चेतनशी संपर्क होता. हत्येनंतर दोघांची भेट झाल्याची माहितीही पोलिसांच्या तपासात पुढे आली आहे. त्यामुळे रितेशला या कटाची किती माहिती होती आणि त्याची प्रत्यक्ष भूमिका काय होती, याचा तपास महत्त्वाचा ठरत आहे.
तपासादरम्यान पोलिसांनी आरोपींच्या डिजिटल संवादाचीही छाननी केली. डिलीट करण्यात आलेले काही व्हॉट्सॲप चॅट आणि संदेश पुन्हा मिळवण्यात आल्याचे सांगण्यात येत आहे. या संभाषणांमधून हत्येच्या नियोजनाशी संबंधित काही महत्त्वाचे धागेदोरे मिळाल्याचा पोलिसांचा दावा आहे. त्याआधारे रितेशचा या प्रकरणातील सहभाग आणि इतर आरोपींसोबतचा संपर्क तपासला जात आहे.
केतनविरोधात कारवाई करण्यासाठी यापूर्वीही वेगवेगळ्या पर्यायांवर विचार करण्यात आल्याचा संशय तपासातून पुढे आला आहे. त्यामध्ये त्यांचे हात-पाय मोडण्याच्या कथित योजनेचाही समावेश आहे. मात्र, ही योजना प्रत्यक्षात कितपत पुढे गेली आणि त्यानंतर सुपारी देऊन हत्या करण्याबाबत नेमकी कोणती चर्चा झाली, याचा तपास अद्याप सुरू आहे.
१८ जून रोजी केतन अग्रवाल यांना लोहगड किल्ल्यावर नेण्यात आले आणि त्यानंतर त्यांचा मृत्यू झाला. सुरुवातीला हा दरीत पडून झालेला अपघात असल्याचे चित्र निर्माण झाले होते. मात्र, तपास पुढे गेल्यानंतर पोलिसांना या घटनेमागे पूर्वनियोजित कट असल्याचा संशय बळावला. त्यानंतर सिया गोयल आणि चेतन चौधरी यांना अटक झाली आणि आता रितेश हांगेच्या अटकेमुळे हत्येपूर्वीच्या नियोजनाची आणखी एक कडी तपास यंत्रणेच्या हाती आली आहे.
आता पोलिसांसमोर हत्येचा कट नेमका कधी आखला गेला, बाहेरील व्यक्तीमार्फत हत्या करण्याची चाचपणी कोणी केली, रितेश हांगेची या संपूर्ण प्रकरणातील नेमकी भूमिका काय होती आणि या कटात आणखी कोणाचा सहभाग होता का, हे प्रश्न आहेत. रितेशची १२ सप्टेंबरपर्यंत पोलीस कोठडी असल्याने त्याच्या चौकशीतून या प्रकरणातील आणखी माहिती समोर येण्याची शक्यता आहे.
अष्ट दिशा 24/7 न्यूज
